گؤزلریز آیدین، اوستانی شبکه وئریریک! / قیزیل اؤزن

توزگون(سه‌شنبه) ۱۰ دی ۱٣٨۷ - ٣۰ دسامبر ۲۰۰٨

دئدیلر: گؤزوز آیدین! اوستانی شبکه وئریریک!! بوندان بری بو اؤلکه ده اولان باشقا دیللرین آرادان گئتمه سینه قارشی دوراجاغیق. بونلار بیزیم کولتورل خزینه میزدیر. یئرلی کولتورلره آرخالاناراق، دیشاریدان گلن کولتورلر باسقی سی اؤنونده راحاتجاسینا دایانا بیله ریک!!!».

نئچه ایل بو سؤزون اوستوندن گئچدی. ایندی تیلویزییادا اولان وئرلیشلره سای سالیرام. بئش بارماق ساییسیندان آز پروقرام تورکجه( دؤرلت ایسته ین سینیق سالخاق تورکو) اولوب. قالمیش پروقراملاردا باش کنده اولان دیل اوزرینه یاییملانیلیر. بو اؤلکه ده بئش دؤولت شبکه سی اولا اولا، اوستانی شبکه لرده یوزه دوخسان فایز پروقراملار فارسجا اولدو. تورکجه اولان برنامه لرده دانیشیلان دیله، تورکجه دئمک اولماز. اوچ دیلی بیربیرینه قاتیب بیر یئنی آدی بیلینمز دیل دوغولور. بو آپاریجی لارین تورکجه ده یازی و دانیشیق باجاریقلاری اولمادان دولایی دوزگون تورکجه نی دانیشا بیلمیرلر. اورادا ایشله ین آداملارا اؤیره تیم دؤنمی قویما صدا سیمانین وظیفه لریندن بیری ساییلا بیلر. آنجاق یازیقلار اولسون بو سؤز فارسجا یازما بؤلوملرینده وار. تورکو بؤلومو هیهات!! تورکجه یازی قایداسی، دانیشما قوراللاری، یازما و پوزما صدا و سیمایا یاراشمایان بیر ایشدیر. استغفراللاه!!!

اوستانی شبکه لر میللتی اؤز دیللریندن قاچیردیر. باشقا سؤزله دئسماوستانی شبکه لر فارسجادان فرقلی اولان دیللرین آرادان گئتمه سینده اؤنملی یوک داشیمادادیر.

آتالاریمیزین بیر گؤزل سؤزو یادیما دوشور، منی فیکره جومدورور؛ او سؤز بئله دیر:«دوشانا دئییر قاچ. تازی یا دئییر توت». بو آتالار سؤزونو بئله یازماق ایسته ییرم: «دؤرلت منه دئییر اوستانی شبکه وئرمیشم، سنین تورکو دیلین قوروسون. اوستانی شبکه یه بویروق وئریر حلققین یوخ دوزگون تورکو دانیشان، اوشاقلارا اورکو کارتون سالان باخالار. تئز تئز ایشله بو دیلی آرادان آپار. قوی تورکجه، کوردجه، عربجه و باشقا دیللر بو اؤلکه دن یوخ اولسون. یالنیز بوردا فارس یاشامالیدیر».

ایندی سن نه دوشونورسن؟؟؟

www.qizilozen.blogfa.com