"اویرنجی" نین سایان آدلی اویرنجی درگی سی سوروملوسو ایله موصاحیبه سی

اومید شکری اردبیل ده بویوب بویا چاتمیش 31 یاشلی بیر گنج دیر. 22 یاشیندان بری اویرنجی حرکاتی ایله تانیش اولوب. سیاسی فعالیت لرده ن چوخ فرهنگی فعالیت لره اونم وئریب و چوخلو باشاریلار الده ائدیب. سایان آدلی اویرنجی درگی سی نین مودورو اولوب و ایران-ین اویرنجی درگی لری ایچینده ذیرولره دیرمانیب. بیر چوخ فستیواللاردا اشتراک ائدیب و اودول لر آلیب. او ایندی آرتیق اویرنجی حیاتین بیتریب، اوزه ل بیر شرکت ده ایشه مشغول اولوب. ایندی ایسه سایان درگی سی نین سورملولوغون باشقا بیر یولداشینا وئرمک ایسته ییر. آما بو ساعته کیمی بیلیم یوردو بو ایسته یه اونم وئرمه ییب. بو سفر اویرنجی سیته سی اولاراق، اومید بی له موصاحیبه یه قرار وئردیک. ایندی ایسه او بیزیم سورولاریمیزی جاوابلاماغا چالیشیر.

سه شنبه 17 اردیبهشت 1387

اویرنجی: هر شئی ده ن اونجه سیزده ن بو موصاحیبه یه قاتیلدیغینیز اوچون تشککور ائدیریک. باشلانیش اولاراق لطفا اوزونوزو اوخوجولاریمیزا تانیتدیرین؟

من اومید شکریم 1356 جی ایلینده نمین شهرینین کله سر کندینده آنادان اولموشام. 4 یاشیم اولارکن عایله ایله بیرلیکده اردبیل-ه گلمیشیک. ابتدایی و اورتا مکتبی اردبیل-ده اوخوموشام. سونرا اردبیل-ین پیام نور بیلیم یوردوندا "انگیلیس دیلینین  مترجم لیگی" نده تحصیل آلمیشام  و  ایندیسه بیر خصوصی شیرکت ده ایشه مشغولام.

اویرنجی: آذربایجان میللی حرکاتی و اویرنجی حرکاتی ایله نه زاماندان بری ارتباطینیز وار؟

1378 جی ایلینده ن بری اویرنجی درگیلری اوخومایا باشلادیم و بئله لیکله اویرنجی حرکاتی ایله تانیش اولدوم.

اویرنجی: اویرنجی اولدوغونوز زامانلار سایان درگی سی نی چیخاردینیز. بو درگی حاقدا گئنیش معلومات وئرمه نیزی خواهیش ائدیره م.

1380 جی ایلین آبان آییندا سایان درگی سینی نشر ائتمک آماجی ایله بیلم یوردو سوروملولارینا دیلکجه وئردیم. 8 آی بویو سوروندوردولر آما مجوز وئرمه دیلر. سونوندا 1381-ینجی ایلین یایندا مجوز وئریلدی. ائله او زامان ایلک سایمیز 200 تیراژدا یاینلاندی. درسلر باشلاناندان سونرا 2-جی سایمیز ایسه 350 تیراژدا یاینلاندی. بئله لیکله هر 2 آی دا بیر نومره درگی ده ن چاپ ائتدیک. سایان درگی سی ایران بیلیم یوردلاری ایچینده ایلک 3 دیل لی اجتماعی، فرهنگی درگی ایدی (تورکجه، انگیلیزجه و فارسجا). سایان-ین سوروملوسو و امتیاز صاحیبی من ایدیم و منده ن علاوه یازالار قروپو یازیلارا دیقت ائده ردیلر. بیز چالییشدیق کی بیز دن اونجه یایملانان درگی لرین تجربوبه لرینده ن فایدالاناق. ائله بونا گوره ده بو گونه قدر بو درگی نین داوملی اولابیلیب. سایان بوتون درگی لر فستیوالاریندا ایشتراک ائتدی (قاپیداندا قوسایدیلار پئنجره دن گئیره ردیک). بو گونه قده ر 50 یاخین اودول آلابیلیب و دئمک اولارکی ایراندا 3000 اویرنجی درگیسی ایچینده سایان  2-جی و یا 3 جی درگی اولوبدور. 84 جی ایلینده قورولان درگی لر فستیوالیندا توریسم و میراث قرهنگی بولومونده سایان درگیسی ایراندا 2 جی اولدو  و.......

بیز او قدر فئستیوالاردا ایشتراک ائتدیک کی فارس اویرنجی لری بیزی آذربایجان مدافیعه چی سی کیمی تانیمیشدیلار. سایانین چئشیدلی یازیلاریندان ایران سویه سنینده یاییلان گونده لیک لر و سیته لر ده فایدالانیب. سایان دا یایملانان یازیلار بیر چوخ گونده لیک لرده اورنک اوچون همشهری و www.chn.ir, و....یاینلانیب. من اوزوم بونا چوخ فخر ائدیره م کی آنا دیلی گونون سایان درگیسی بوتون اویرنجی و باشقا چالیشقان و ضیالیلارلا بیرلیکده رسیمته سالابیلیب. آنا دیلی گونو ایلک دونه اولاراق 81-جی ایلده سایانین 3-جو سایسیندا یایلان بیر یازی و بیر ترجومه (آنا دیلی گونو و آنا دیلی ناغیلی) ایله تانینماغا باشلادی. من بیلیم یوردونو بیتیردیکده ن سونرا بو درگی نی باشقا دوستلارا امانت ائتمک اوچون بیلیم یوردو سورملولارینا مراجعت ائتمیشم، آنجاق 10 آی اولار کی دانیشگاه بیزیم مکتوبا جاواب وئرمه ییب و بیزیم اونردیگیمیز یئنی درگی سورملوسونو تایید ائتمه ییب.

اویرنجی: "آذربایجان اویرنجی درگی لری اوجاغی" نه زاماندان تشکیل تاپیب. سیزین اوردا نه کیمی رولونوز اولوب؟ بو اوجاق نه کیمی فعالیت لر ائدیر؟

بو اوجاق ایلک دفعه اولاراق 80 ایلین خورداد آیندا بیر چوخ اویرنجی درگی لری مسئوللاری طرفینده ن، تهرانین خواجه نصیر بیلیم یوردوندا تشکیل تاپیپ دی. بو اجاق 83 ده همدانین بوعلی سینا بیلیم یوردوندا قورلان 2 جی درگی لر فستیوالیندا اوز آدین آذربایجان اویرنجی درگی لر کانونو نا دئیشدیره ره ک اوز فعالیت لرینه داوام ائدیب. اوجاق رسمی اولاراق اذن آلابیلمه ییب، آنجاق غیر رسمی اولاراق آذربایجان اویرنجی درگی لری آراسیندا بیرلیک یاراتماغا چالیشیر و بللی موناسیبت لرده بیلدیری لرده وئریر.

اویرنجی: آذربایجان میلی حرکاتی و اویرنجی حرکاتی نین تشکیل تاپماسیندا اویرنجی درگی لرینین یئری و رولو نئجه اولوب؟

اویرنجی درگی لر اویرنجی حرکاتیتن تریبونو اولوب و بیر مدیا اولاراق اویرنجی لرین فیکیرین یاییب. بو مدیاسیز چوخ ایشلر یئرده قالاجاقدی و....

در گیلر اویرنجی لرین بیر یئره توپلانماسیندا چوخ بویوک و اونملی رولو اولوب.بو درگی لر بیر اوجاق اولاراق آذربایجان اویرنجی لر ایش بیرلیگینی آرتیریب و آذربایجان دیلی و مدنیتینی  اویرنجی لر آراسیندا یایماغا چالیشیب.

اویرنجی: آذربایجان اویرنجی حرکاتی 19 اردیبهشتی اویرنجی گونو اولاراق تانیملاماقلا باغیمسیز بیر اویرنجی حرکاتی کیمی اوزونو گوسترمه یه و تانیملاماغا چالیشیب. سیزین بو حاقدا دوشونجه لرینیز نه دیر؟

اویرنجی حرکاتی 68 ده اوز فعالیتینی  اوزگور و باغیمسیز باشلاییب و بو زاماندان باغیمسیز قالمالیدی.

اویرنجی: سیزه گوره بو گون اویرنجی حرکاتی هانسی مسئله لری گوندمده ساخلامالی دیر؟

بوتون ساحه لرده فعال اولمالی دیر. اوزه للیکله اوجاقلار قورما، درگی لر یایما، اینسان حاقلاری ساحه سینده و مدنیت ساحه سینده چالیشمالی دیر.

اویرنجی: آذربایجان اویرنجی حرکاتی نین قوت و ضعف نقطه لری سیزه گوره نه لردی؟

بوتون اویرنجی حرکتلری کیمی تجروبه سیزلیک و احساسلارا قاپانماق بو حرکتین ضعف لریندندیر. حق سئورلیک، هئچ بیر قودرته دایانماماق، هر چئشیدلی قودرتی تنقید ائتمک و مصلحت لره قاتیلماماق دا اونو گوج لریندندیر.

اویرنجی: اویرنجی درگی لرینین قاپاندیغی بیر دونمده اویرنجی سیته لری نین اهمیتی نی نئجه ده یرلندیریرسینیز؟

اویرنجی حرکاتی اینرنتدن ایلگی ده اولمالیدیر. آما اونملی اولان فعالیتلر اونودولموش و بو 2 ایلده نئچه اویرنجی سیته  و و بلاگ یولا دوشوب. البته درگی باشقا رول داشیمالیدیر، سیته باشقا رول. درگی لرین هر دانیشگاهین اوزنه اوزل اولان هاواسیندا یارانیر و اورانی اویرنجی لرین یازیلارین و ایستک لرین داشیماقلا تام بیر عمومی دوشونجه و ایستک دیر و جمعی ایشلر گوجله ندیریر. ایلگیه سبب اولور.

اویرنجی: گونئی آذربایجان اینترنت سیته لری نی نئجه گورورسونوز؟ اونلارین باشاریلی و باشاریسیز نقطه لری هانسی لاردیر؟

اینرنت سیته سی ائتگیلی و قالارقی دیر، آنجاق اوخوجولارین اعتمادین قازانماق اوچون سیته تئز تئز گونجل اولمالیدی و خبرلرین قایناغینی وئرمه لی و دوزگون ژورنالیستی خبرلری اولمالیدیر. منجه هر بیر کیمسه کی سیته یا دا وبلاگ ایشله دیر بیر ژورنالیست اولمالیدی و خبر و رئپورتاژ یازماغی باجارمالیدی و ان اونملی گوروی باشقا دیللری بیلیب خبری او دیللرده یایماق اولابیلر.

اویرنجی: اردبیل ده اویرنجی حرکاتی نین دورومو نئجه دیر؟

اردبیل-ده شهرین دانیشگاهیندا آسیلی اولاراق اویرنجی حرکتی یئتگین و پیشمیش دئییل، آما بوردا دا چالیشقان اویرنجی لر بوتون گوجلریله بو بوشلوغو دولدورماغا چالیشیر لار.  آما کیچیک یئرده  ایش حیطه سی ده  کیچیک دیر  و بیر آز آرتیق چالیشانلار تئز او قیرمیزی چیزگی لری پوزولار. دانیشگاهیندا سورمولاری قانون سوز داورانبر و اوز اویرنجی لرین  ائشیک قووه لرین قارشیسیندا حمایه ائتمیر  بو سون توتوقلانمالار دا بیر ساده نمونه دیر.

اویرنجی: سیزه گوره گله جکده اویرنجی حرکاتی هانسی چیزگی لر ایچینده حرکت ائتمه لی دیر؟

اویرنجی ان تئز و راحات ضربه گورن  نسل دیر، اونا گوره کئچمیشه تای اویرنجی لر قورال لار و قانونلار چرچیوسینده هئچ بیر شئی اولماسا دا ساده جه اوز  توپلانتی لاریندا و گزیلرده چالیشمالیدیلار. اویرنجی لرین گورویلریندن بیرده بودور کی هئچ گوجه دایانمادان مصلحتلره اویمادان تنقید ائتسین.

اویرنجی: آذربایجان اویرنجی حرکاتی نئجه اوزونو دمکرات، پلورال و اخلاق پرنسیب لرینه اویان بیر حرکت کیمی گوستره بیلیر؟

نئچه سسلی لیک گلیشمه نین سونوجلارینداندیر. گلیشمیش و آیدین دوشونجه اویرنجی لریمیز اولماسا نئچه سسلی بیر حرکت افسانه دیر،  اونا گوره  اویرنجی لریمیز اوزلرین گوجلندیرمه لی  و اوز گورویلرین بیلمه لیدیرلر.

اویرنجی: اویرنجی حرکاتی نین اولویتلری سیزجه نه لر اولابیلر؟

منجه اوزلرین ساوادلاندیرما، دیل و مدنیت میزی اویرنجی لر آراسیندا یایماق اولابیلر.

اویرنجی: آذربایجان اویرنجی حرکتی، میللی حرکتین ایندیکی دورومونا نه ائتگی لر بوراخا بیلر؟

هر خالقین اویرنجی سی اونون چیچک لنمه سینده دانیلماز رولو اولابیلر، آذربایجاندا بو مسله دن ایستیثنا دئییل.

اویرنجی: بو موصاحیبه یه قاتیلدیغینیز اوچون ساغ اولون.