سون اوچ آیدا ۶-جی آذربایجانلی اویرنجی حبس ائدیلیب
آزادلیق رادیوسو . آیگون مورادخانلی
ایراندا آذربایجان مدنیتینی تبلیغ ائدن میللی درنکلر قوردوغونا و تورکجه درگی بوراخدیغینا گؤره، داها بیر اویرنجی حبس ائدیلیب. بو اصفهان اونیوئرسیتئتینین گمیچیلیک فاکولتهسینین طلبهسی مجید ماکویدیر. اورمیه شهریندن ژورنالیست ایسماعیل جوادی «آزادلیق» رادیوسونا دئییب کی، ماکوینی اوچ گون اونجه ایرانین امنیت قوهلری حبس ائدیب:
«ایندییه قدر اونون طالعی ایله باغلی هئچ بیر بیلگی یوخدور. بیر نئچه آی اؤنجه اونو مای حرکاتینین ایل دؤنومو ایله باغلی، آنا دیلینده تحصیل طلبلرینه گؤره حبس ائدیب اطلاعاتا آپارمیشدیلار. ایندی گلن خبره گؤره، اطلاعاتین اورمیه بؤلمهسینده ساخلانیر».
ایسماعیل جوادینین سؤزلرینه گؤره، بو، سون اوچ آیدا ایراندا حبس ائدیلن آلتینجی آذربایجانلی طلبهدیر. ایندییه قدر توتولان طلبهلرین هئچ بیرینین طالعئی ایله باغلی دقیق بیلگی یوخدور:
«منصور امینیان، سجاد رادمهر، فراز ذهتاب، آیدین خواجه ای، امیر احدی دیر ایسه تبریزده ساخلانیر».
حبس ائدیلندن سونرا اونلارین هئچ بیرینه عائلهلریله علاقه ساخلاماق ایمکانی وئریلمهییب. طلبهلرین وکیلی ده یوخدور.
ایسماعیل جوادی دئییر کی، بئله اتهاملارلا حبس ائدیلنلره یالنیز محکمهده وکیلدن یارارلانماق حقوقو وئریلیر. بو ایسه طلبهلرین حقوق و آزادلیقلارینین کوبود شکیلده تاپدانماسینا سبب اولور:
«منصور امینیان خوی شهرینده حبسدهدیر. عائلهسی بؤیوک تعضییقلر آلتیندادیر. ائشیتدیکلریمیزه گؤره، اؤزونون دورومو دا یاخشی دئییل. اونلارین هامیسینین سوچو اونیوئرسیتئتلرده میللی درنکلر قورماق، آنا دیلینده درگیلر حاضیرلاماقدیر».
منصور امینیان اونیوئرسیتئتده دوکتورلوق مرحلهسینی باشا ووروب. اونون یالنیز دوکتورلوق دیپلومو آلماسی اوچون بیر ایمتحانی قالیب کی، حبس ائدیلدیگیندن ایندی بو مومکون دئییل.
سون آیلاردا حبس ائدیلن ابراهیم رشیدی نین ایسه تحصیل آلماق حقوقو بوتونلوکله الین دن آلینیب. بونو ایراندا آذربایجانلی سیاسی محبوسلارین حقوقلارینین مدافعه آسسوسیاسینین سوزجوسو واحید قاراباغلی دئییر. اونون سؤزلرینه گؤره، ایراندا تورک طلبهلر آراسیندا تانینان شاعر، عینی زاماندا اینسان حاقلارینین مدافعهچیسی ا. رشیدی عالی تحصیلینی باشا ووردوقدان سونرا یوکسک لیسانسا قبول اولماق ایستهسه ده، حکومت بونا ایمکان وئرمهییب.
ایرانین تحصیل ناظیرلیگینده رشیدییه بیلدیریبلر کی، او، تحصیل حقوقوندان محروم ائدیلیب. واحید قاراباغلی نین سؤزلرینه گؤره، سون بیر نئچه آیدا حبس ائدیلن طلبهلرین ده بوتون حاقلاری اللریندن آلینیر:
«اونلارین اتهامی آچیقلانماییب، قوهوملارییلا گؤروشمک ایمکانلاری یوخدور، وکیل توتما حاقی وئریلمهییب، عائلهلرینی بیلهرکدن نیگاران ساخلاییرلار. عائلهلر بو ایشین آرخاسینجا گئدنده ایسه اونلاری تهدید ائدیرلر. بو یاخینلاردا سجاد رادمهرین آناسینا اطلاعات-دان تئلئفون آچیب خبردارلیق ائدیبلر کی، اگر اوغلو ایله باغلی خبرلری مئدیایا چیخارسا، اوغلو داها چوخ ایشگنجهلرله اوزلشهجک».
واحید قاراباغلی دئییر کی، ایندی ایران آذربایجانیندا بوتون اونیوئرسیتئتلره اطلاعات-این نظارتی گوجلندیریلیب:
«تورک دیلینده تحصیل حقوقونو طلب ائدن، بو مقصدله ورقهلر یایان، درگیلر چاپ ائدن بوتون طلبهلر خصوصی خیدمت اورگانینین بؤلمهلرینه آپاریلیر».
حقوق مدافعهچیلری باش وئرنلری اینسان حقوق و آزادلیقلارینین کوبود شکیلده پوزولماسی کیمی دیرلندیریرلر.
قایناق : http://www.azadliq.org/content/Article/1196112.html
نظر دهید