اویرنجی نین هفته لیک سیاسی یادداشتی: ميللي حركتين ايران رياست جمهوري سئچکي لرينه گؤره موناسيبتي نه اولماليدير؟

ائلگون(شنبه) ١٨ آبان - ٨ نوامبر ١٣٨٧

ايران رياست جمهوري سئچکي لرينه بير ايلدن آز زامان واردير. رسمي و غير رسمي خبرلره اساسا حاكميتين هر ايكي قولو طرفيندن نئچه نفر آداي اولماق ايسته يير. نئچه موستقيل آدايين دا آدي آرادا واردير. بو هفته نين يازيسيندا اؤزل بير قروپ يا شخصين خيرينه يا ضررينه يازمادان ميللي حركتين بئله بير اولاي لارلا موناسيبتي و گؤتوردويو يولو آچيخلاييب و بير سيرا اساس سورولاري ايرلي سوره جه ييك. سورولارا بو يازيدا و حتي بو ياخينليقدا جاواب تاپماق ايدديعاسيندا دئييليك آنجاق دوز سوال طرح ائتمه يي جاواب وئرمك دن اؤنملي بيليريك. بيزجه سورولار دوز و يئرينده ايره لي سورولورلرسه جاواب لار گئج يا تئز اؤنريله جك لر. هر ندن اؤنملي بير تنقيدي و پاتولوژيك ياناشمانين اورتايا قويولماسي دير.

ايران خبر آژانس لاري خبرلرينه داياناراق چوخ سايدا شخص لرين آداي اولماسي گؤزلنيلير. بونون ندنلريني بئله سيرالاماق اولار.

1-ايراندا ايقتيصادي، سياسي و فرهنگي دوروم كئچن 3 ايلده نفتين قيمتي آرتديقجا گرگينلشيب. بئله دوروم حكومت داليسجا اولان شخصلره ميللي منافع و يا حاكميتين حياتيني قوروماق باهاناسييلا مئيدان وئرير. ايقتيصادين گئريله مه سي و باهاليغين يوخسول و متوسط قاتلارا گتيردييي فیشارلار عموم رضايت سيزلييه ندن اولماقلا ايندي كي پريزيدنتين اوي قازانماسيني انگلله يه بيلير. سياسي باسقی لارين آرتماسي ايران ايچريسينده توپلومسال و ميللي حركت لري چيخيش يولو آختارمايا مجبور ائدير. فرهنگي فضانين باغلانماسي گئنج و فرهنگي فعال لاري اعتراض ائديب عملي بير حركت يولا سالمايا مجبور ائدير و ايرانين نئچه شهرينده بازارين باغلانماسي تاجير و سرمايه دار قات لاردا اولان اعتراضي حركت لرين اولماسيني گوسترير. اوست اوسته بو دوروم حاكميتين هر ايكي جيناحدا اولان مهره لريني قدرتي ائلده ائتمه يه تحريك ائدير.

2- ايرانين نووه پلانلاري و بشر حاقلاري پوزونتولاري هر گون بين الخالق سيخينتي لار و تحريم لري آرتديرير. بو  مسئله منطقه و بين الخالق باخيمدان دا ايرانين و احمدي نژادين دورومونو ائنديرير.

3- امريكادا اوبامانين اوي قازانماسي اونون قارشيسندا اصلاح طلب بير شخصين ايراندا پرزيدنت اولماسيني منطقي گوسترير.

اينديكي دورومو نظرده آلاراق نئچه مسئله يه جاواب آختارماغي گركلي گؤروروك:

1-طبيعي دير كي واقعيت لر بيزيم آرزي ديلك لريميز اساسدا دؤزنله نمير. بلكه واقعيت لرين اؤز قايدا و قانون لاري وار و بو قايدا- قانون لار لا يارانيب زامان ايچينده آخيرلار. بيز دورومو نه قدر رئال آچيخلايا بيليريك؟ نه قدر اولايلار ، پروسه لر، آخيم لاري و اونلارين ايچ قايدالاريني تانيريق؟

2-ايندييه دك ميللي حركت ايرانا باغلي اولايلار و اؤزلليكله سئچکي لره فرقلي موناسيبت لر گؤستريب. مجليسين بئشينجي دؤر سئچکي لرينده تبريز شهرينده سئچکي لره قاتيلمايي صلاح گؤرن لر اكثريت ده اولوبلار. 2 خرداد 1376 دا بللي بير موضع اولماييب. مجليسين 7 -جي دؤورونده و شورالار سئچکي لرينده تهران شهرينده سئچکي لره قاتيلان جمع لر و قروپ لار اولوب اما باتي آذربايجان ايستيثنا اولاراق حركتچي لرين سياستي چوخونلوقلا ميللي حركت آدينا قاتيلماماق و تحريم ائتمك اولوب دور.  بو دؤنه بو اساس سوالي اؤزوموزدن سورمالييق: گؤتوردويوموز بو سياستلره تنقيدي باخيشيميز اولوب مو؟

بيز تحريم بير موضه سينده اولمالييق يا جريان لاردا فعال رولوموز اولماليدير؟ بو سورويا جاواب وئرمك اوچون بيز بو سوالا جاواب تاپمالييق: بيز دئوريمجي بير موباريزه ني سئچيريك يا رئفورم چو بير موباريزه ني؟ ايرسه دئوريمجي بير موباريزه يه قول چكيريك تاكتيكي اولاراق سئچکي لره قاتيلماييي صلاح گؤروروك مو؟

3-هر حالدا بيز قاتيلاق يا قاتيلماياق سئچکي لر قورولاجاق و بعضي لري ده چئشيدلي دليل لره گؤره راي وئره جك لر. سئچکي لرده هانسي جيناحين كانديدالارينين چيخماسي ميللي حركته آرتيق فضا آچابيلر؟

4-بعضي آديلار بير سيرا حاقلاري موقتي اولسا دا طرح ائده جك لر. بونلارين بعضي سي بيزيم ايستك لريميز اولا بيلر بعضي سي ده غير مستقيم اولاراق حركته ائتگي بوراخا بيلر. اؤرنك اولاراق 15-جي اصلين ايجرايي اولماسي شوعاري ميللي حركتين ايداآلاري ايچينده يئرلشير. سيويل توپلوم(جامعه مدني) شوعاري دا دوغرودان عملي اولسا ميللي حركته فضا آچا بيلر. بيز بو ايدالاري ايره لي سورن آديلارا گؤره نه موناسيبت گؤسترمه لييك؟ بيزيم هانسي ايستك لريميز ايران سيستئمينده جاواب آلا بيلر؟ آذربايجان آديیلا سئچکي لره گيريب و بير سيرا  شوعارلاري وئرمكله راي قازنماق ايسته ين آدايلارين قارشيسيندا نه ائتمه لييك؟ حاكميتين بير سيرا حاقلاريميزا ايمكان يارتماسي نه قدر ميللي حركتين انرژي سيني آلا بيلر؟ عكسينده نه قدر ميللي حركت سؤيلمينين گئنيش ياييليب و يئني بير مرحله يه آدديم آتمايا يارديم ائدر؟

5-آذربايجانلي بير آدايين يازيليب و حتتي بير سيرا بيزيم سؤزلري ايفاده اتمه سييني مومكون و صلاح گؤروروك؟

6-بيزيم بئله بير سياسي فضادا اوي توپلاما و جريان يارتمايا نه قدر گوجوموز وار؟

7-فرض ائدك ميللي حركت يا بعضي قروپلاري دستك لدييي بير شخص ايرانين پرزيدنتي اولدو! بو  شخص لر و يا قروپلار قاتيلسالار نه الده ائده بيلرلر؟ حاكيميتده موقتي اولاراق نفوذ ائتمك بيزه يارديم ائده بيلرمي؟ قاتیلان فردلر نه شرايطده بو ايشي گؤروب و نه ايجرايي تضمين لر آلماليديرلار؟

8-اينديه دك بوتون سئچکي لرده ميللي حركتين چئشيدلي شخص، طيف و قروپلاري سئچکي لره گؤره فرقلي نظرلر وئريب لر. گاهدان قاتيلان شخص لر خييانته محكوم اولوب لار. بيزيم بئله زامان لار اويغون بير استراتژي و تاكتيكيميز اولا بيلرمي؟

9-ميللي حركت و اونا باغلي اولان لار سئچکي لره قاتيلماسالار دا يارانان اتمسفردن ايستيفاده ائده بيلرلر. بونا گؤره عملده نه ائتمك اولار؟ هانسي ايستك لريميزه فضا آچيقدير؟

اوخودوغونوز كيمي بو يازيدا هئچ جاواب فيكرينده دئيلديك اما نئچه اؤنملي و تمل سورويو اؤرتايا قويماق ايسته ييرديك. بو گوندن اعتيبارا نئچه آي جاواب آختارماغا واختيميز وار؟ قارانليقدا آدديملاق ايستمه سك بونلارا بللي و رئال جاواب تاپماليييق. بئله اولماسا هر هانسي پراتيك بير عمل بؤيوك سهولر و يئرسيز چاتيشمالارلا بيرگه اولاجاق دير.

گله جک بیزیمدیر

www.oyrenci.com